Wasu ‘yan bindiga da ake zargin masu garkuwa da mutane ne sun yi garkuwa da gawar wani marigayi Ugwuanyi Isra’ila tare da dukkan ‘yan uwa da ke jigilar ta daga Legas zuwa jihar Enugu.
An tattaro cewa gawar Mista Ugwuanyi, daga Ameze Owerre, al’ummar Umabor da ke karamar hukumar Nsukka, ana kan hanyar kai ta gida domin binne ta a lokacin da ‘yan bindigar suka yi musu kwanton bauna.
Lamarin ya faru ne a kan titin Mile 9 a unguwar Umuoka a karamar hukumar Udi ta jihar a ranar Lahadi, 18 ga Fabrairu, 2024.
A cewar jaridar Nation, masu garkuwa da mutanen sun tuntubi iyalan a safiyar ranar Litinin, 19 ga watan Fabrairu, inda suka bukaci a biya su N50m kudin fansa.
“Gawarsa na kan hanyarta ne daga Legas a jiya (Lahadi) lokacin da masu garkuwa da mutane suka tsayar da motar da ke dauke da gawarsa, sannan kuma mutanen da ke cikin motar tare da direban duk sun yi garkuwa da su a karamar hukumar Umuoka Udi ta jihar Enugu. Masu garkuwa da mutanen sun kira iyalansu inda suka bukaci a biya su kudin fansa Naira miliyan 50,” inji wata majiya ta iyalan.
“Tsoron mu shine kada gawar ta rube kafin su sake su. Ba mu san abin da za mu yi ba saboda al’ummarmu da ke Legas sun kashe kuɗi da yawa don rashin lafiyar Isra’ila.”
Majiyar ta yi kira ga jami’an tsaro da gwamnatin jihar da su taimaka wa jama’a domin ceto wadanda ake tsare da su.
From ISYAKU.COM