Rundunar ‘yan sandan jihar Neja ta kama wata mata mai suna Aisha Jibrin wanda ake zargin ta haddasa wata zanga-zanga da aka gudanar a birnin Minna.
Ku tuna cewa mazauna Minna a ranar Litinin, 5 ga Fabrairu, 2024, sun bazama da yawa kan titi don nuna rashin amincewa da wahalhalun da ke tattare da tsadar rayuwa a kasar.
Zanga-zangar dai ta fara ne a lokacin da wasu mata suka tare hanyar Minna-Bida a babban filin taro na Kpakungu domin nuna bacin ransu kan abin da suka kira wahalar da gwamnatin Bola Tinubu ta jawo. Daga baya wasu matasa sun shiga lamarin inda suka dinga hana ababen hawa tafiya.
Kakakin rundunar Yan Sandan jihar, DSP Wasiu Abiodun, wanda ya bayyana hakan a wata sanarwa a ranar Laraba, 7 ga watan Fabrairu, ya ce an kama Aisha tare da wasu mata biyu da wasu mutane 22 da ake zargi.
“Za a iya tunawa a ranar 5/2/2024 da misalin karfe 0700, mata da ’yan bata-gari ne suka hada kansu suka tare hanyar Minna zuwa Bida da kuma zagayen Kpakungu suna masu zanga-zangar nuna adawa da karin farashin kayan abinci, lamarin da ya haifar da cikas ga babbar hanyar. da kuma hana masu ababen hawa, matafiya da sauran masu amfani da hanyar samun damar halartar kasuwancinsu na halal.”
“Nan da nan ne rundunar ‘yan sandan ta shirya tawagar ‘yan sanda da ke sintiri karkashin jagorancin mataimakin kwamishinan ‘yan sanda na Operation DCP Shehu Umar Didango zuwa wurin da lamarin ya faru, kuma bayan lallashinsu da ‘yan sandan suka yi, da gangan masu zanga-zangar suka ki barin hanyar domin amfanin jama’a, yayin da mai girma mataimakin gwamnan jihar Neja Com. Yakubu Garba ya yi amfani da damarsa ya halarci wurin da lamarin ya faru, ya kuma yi wa taron jama'ar jawabi, amma duk da haka suka yi kunnen uwar shegu, suka zabi tashin hankali.
“Duk da haka, ‘yan sanda sun yi amfani da mafi karancin karfi don tarwatsa masu zanga-zangar da suka rikide zuwa tashin hankali ta hanyar kai wa ‘yan sandan hari da muggan makamai kamar su duwatsu, kwalabe, sanduna, da kuma lalata motocin ‘yan sanda da ke sintiri da wasu sassan rufin ofishin Yan sanda na Kpakungu.
Ana cikin haka ne rundunar ‘yan sandan ta kama shugabar Muzaharar mai suna Aisha Jibrin mai shekaru 30 da Fatima Aliyu mai shekaru 57 da Fatima Isyaku mai shekaru 43 da ke unguwar Soje ‘A’ da ke unguwar Kpakungu a Minna da wasu bata gari ashirin da biyu.
“A yayin da ake yi masa tambayoyi, Aisha ta ce ba ta san cewa matakin da ta dauka ya saba wa doka ba, ta hanyar tara mata da miyagu sama da dari su tare babbar hanyar domin gudanar da zanga-zanga. Ta kara da cewa ta sanar da wani shugaban matasa Hassan a yankin, wanda ya yi alkawarin sanar da ‘yan sanda shirinsu na zanga-zangar, amma bai yi hakan ba,” in ji sanarwar.
“A halin da ake ciki kuma, an kai dukkan wadanda ake zargin zuwa SCID Minna domin gudanar da bincike, kuma za a gurfanar da su a gaban kotu da zarar an kammala bincike. Ana ci gaba da kama wasu da aka gano a cikin wannan muzaharar.
From ISYAKU.COM