Nuradeen Shehu, mai shekaru 37 mai gadi a kwalejin Prestige International College, Danmusa Steet, Gadon Kaya, karamar hukumar Gwale a jihar Kano ya kashe kansa.
An tattaro cewa marigayin ya rataye kansa ne bayan ya samu labarin cewa tsohuwar matarsa ta sake yin aure.
Kwamishinan ‘yan sandan jihar, CP Hussaini Gumel, ya shaidawa kamfanin dillancin labarai na Najeriya, NAN, a ranar Talata, 30 ga watan Janairu, 2024, cewa lamarin ya faru ne a cikin daya daga cikin ajujuwan kwalejin.
Ya ce a ranar 28 ga watan Janairu da misalin karfe 10:30 na safe Abdullahi Abdulsalam na Rijiyar Zaki ya kawo rahoton cewa an samu wani Nuradeen Shehu mai gadi a kwalejin bai motsawa bayan ya rataye kansa da igiya a cikin aji.
Ya kara da cewa, tawagar ‘yan sanda daga reshen Gwale, karkashin jagorancin DPO, suna wurin inda suka bude kofar da karfi, suka yanke igiyar, sannan suka garzaya da gawar zuwa babban asibitin Murtala Mohammed inda wani likita ya tabbatar da rasuwarsa.
An mika gawar ga iyalan mamacin domin yi musu jana’iza.
CP ya ce ‘yan sanda za su binciki musabbabin faruwar lamarin.
From ISYAKU.COM