Jami’an rundunar ‘yan sandan jihar Bauchi sun cafke wani da ake zargin barawon mota ne mai suna Ibrahim Mohammed mai shekaru 25 da laifin satar mota a wani Masallaci a karamar hukumar Zariya ta jihar Kaduna.
Kakakin rundunar ‘yan sandan jihar, SP Ahmed Mohammed Wakil, wanda ya bayyana hakan a cikin wata sanarwa a ranar Laraba, 29 ga watan Nuwamba, 2023, ya ce jami’an da ke aiki a hedikwatar ‘yan sandan Tilden Fulani sun kama wanda ake zargin da motar da ya sace a kan babbar hanyar da ta hada jihohin Bauchi da Filato.
PPRO ya bayyana cewa wanda ake zargin wanda ya fito daga Unguwan Gyadi-Gyadi, jihar Kano, amma kuma yana zaune a Gwarinpa, FCT Abuja, ya amsa laifinsa kuma za a mika shi jihar Kaduna domin ci gaba da bincike.
From ISYAKU.COM