Wasu da ake zargin ‘yan bindiga ne sun kashe wasu ‘yan banga guda tara da aka fi sani da ‘Yan Ba Beli a jihar Bauchi.
An kashe ‘Yan Ba Beli ne a dajin kauyen Gamji a lokacin da suke neman ‘yan fashi da suka addabi al’ummar karamar hukumar Ningi tare da kashewa tare da yin garkuwa da mutanen da ba su ji ba ba su gani ba domin neman kudin fansa.
‘Yan bindigar sun kai harin ne wa Yan Ba Beli a lokacin da suka yi musu kwanton bauna inda suka yi nasarar kashe 9 daga cikinsu, yayin da wasu ‘yan kadan suka jikkata.
Lamarin ya faru ne da yammacin ranar Lahadi, 15 ga watan Oktoba, 2023, a lokacin da ’yan Ba Beli ke hawan duwatsun da ke kewayen kauyen Gamji domin neman ‘yan bindigar da ke dajin.
Wani daga cikin ’yan banga a yankin da ya nemi a sakaya sunansa ya shaida wa jaridar Nigerian Tribune cewa ‘yan bindigar sun yi musu kwanton bauna a dajin lokacin da suka fada cikin dajin.
Ya kara da cewa lokacin da suka fada kwanton baunam, ‘yan bindigar sun bude masu wuta da manyan makamai inda suka yi galaba a kan Yan Ba Beli, inda suka kashe tara daga cikinsu, tare da jikkata wasu.
Shugaban riko na karamar hukumar Ningi, Hon. Ibrahim Zubairu Mato, wanda ya tabbatar da faruwar lamarin, ya ba da tabbacin cewa gwamnati za ta ci gaba da yin duk mai yiwuwa don kare rayuka da dukiyoyin jama'a da ba su ji, ba su gani ba a yankin.
From ISYAKU.COM