Wani dan kasuwa mai suna Mallam Umar Tasiu, ya sha bulala har lahira da wasu surukansa suka yi masa a garin Minna na jihar Neja.
Wani makwabcinsa ya shaida wa Daily trust marigayin da ya kammala karatunsa a Jami’ar Al Azhar da ke Masar ya je ganin ‘ya’yansa da ke zaune da tsohuwar matarsa a gidan mahaifinta.
“Ya je ya ga ‘ya’yansa guda biyu da suke zaune tare da tsohuwar matarsa a gidan mahaifinta. Sun rabu amma yaran suna wurin mahaifiyarsu. Ya je ya gansu amma surukansa na baya ba su so ya zo gidansu. Bayan isarsa sun daure shi suka yi masa bulala har ya mutu a gidansu. An dawo da gawarsa gidansa a daren ranar Asabar kuma mun binne shi a ranar Lahadi da misalin karfe 10 na safe,” inji majiyar.
Kakakin Rundunar ’Yan sandan Jihar, DSP Wasiu Abiodun, ya tabbatar da faruwar lamarin, ya ce mamacin ya rasu ne bayan an kai shi Asibitin kwararru na IBB da ke Minna, sakamakon raunukan da wasu ‘yan daba suka yi masa da bulala.
“A ranar 22/10/2023 da misalin karfe 0800, an samu rahoton korafi kan aikata laifin kisan kai a sashin GRA; cewa a ranar 21/10/2023 da misalin karfe 2300 wasu ‘yan daba suka kai wa wani Umar Tasiu dan Angwan Daji hari a Minna kuma ya samu munanan raunuka. An garzaya da shi Asibitin IBB da ke Minna, inda ya rasu. Ana ci gaba da bincike kan lamarin kuma ana ci gaba da kokarin kama wadanda ake zargin,” in ji PPRO.
Wani abokin marigayin, Ahmad Sallah, a wani sakon da ya wallafa a Facebook ya ce tsoffin surukai sun ki amincewa da auren diyarsu da Umar saboda bambancin alidar addini.
“An yi wa Malam Umar duka har lahira a gidan surukinsa. Alaramma mallam Umar tasi'u dan marigayi alh tasiu mai yadi. Alaramma dan kasuwa ne, Hafiz, muhaddith, ya yi aure bayan ya kammala digirinsa a Jami’ar Al Azhar Egypt,” ya rubuta.
“Da alama ya fuskanci wani mawuyacin hali da tsohon surikinsa, wanda a karshe ya yi sanadiyyar mutuwarsa, Alaramma Mallam Umar mutum ne mai kishin kasa, dan kasuwa ne, Hafiz, kuma muhadisi, ya kammala. digirinsa a Jami'ar Al Azhar da ke Masar kafin ya yi aure.
“Ya bayyana cewa dangin matarsa suna da bambancin akidar addini, mahaifinta dan Izala ne, shi kuma Dan Darikah ne, duk da rashin amincewar mahaifinta, sun yi aure sun haifi ‘ya’ya uku tare.
“Abin takaicin shi ne, saboda matsalar kudi a kasuwancin Alaramma, mahaifin matarsa ya yanke shawarar raba su, ya kai karar Alaramma a gaban kotu, yana zargin Alaramma da koyar da ‘yarsa akidar Dariqah.
“Duk da haka, Alaramma ya samu nasarar kare kansa a gaban kotu ta hanyar amfani da iliminsa mai yawa, duk da cewa ya ci nasara, mahaifin matarsa ya dauke ta da karfin tsiya daga wurinsa, watau gidan Alaramma, lamarin da ya sa ala dole suka rabu aure ya mutu.
“Bayan shekaru, mahaifin har yanzu ya kwashe yaran daga hannun Alaramma. Abin takaici, a lokacin da ya je gidan surukinsa yake yunkurin karbo ’ya’yansa daga hannun tsohuwar Matarsa da surukinsa, sai suka kira shi barawo, yanayi da ya sa aka kai masa hari/ duka har ya mutu. Muna mika ta'aziyyarmu da addu'ar Allah ya gafartawa Alaramma Mallam Umar. Kasan wacce zaka dauko a matsayin matarka!. Ya ce.