An tsinci gawar wata malamar Sashen Biochemistry na Makarantar Kimiyyar Rayuwa ta Jami’ar Fasaha ta Tarayya (FUT) Minna a Jihar Neja, Dokta (Mrs) Adefolalu Funmilola Sherifat da aka yanka a gidanta da ke Unguwar Gbaiko a garin. Shafin labarai na yanar gizo isyaku.com ya samo.
Channels TV ta ruwaito cewa shugaban kungiyar malaman jami’a (ASUU) a makarantar Farfesa Gbolahan Bolarin ya ce ,an gano gawar marigayiyar ne a safiyar Lahadi, 29 ga watan Oktoba, lokacin da mabiya cocin ta suka bi ta gidanta bayan ba a gan ta a lokacin hidimar ibada ba.
Wasu mazauna garin sun ce bayan da aka bude kofar gidanta, an same ta a cikin jininta kuma an yi mata yankan rago a makogwaronta da wukake a gefenta. Daga baya hukumomin ‘yan sanda sun dauke gawar zuwa dakin ajiyar gawa.
Kafin rasuwarta, tana zaune tare da wata mai yi mata hidima, amma ta sallami yarinyar a ranar Juma’a, 27 ga Oktoba.
Har yanzu rundunar ‘yan sandan jihar Neja ba ta tabbatar da faruwar lamarin ba kafin lokacin rubuta wannan rahotu.
From ISYAKU.COM