Wani mumunan lamari ya auku a jihar Imo yayin da Jaridar Vanguard ta rahoto cewa Yan bindiga sun kashe soji takwas, Yan sanda da jami'an NSCDC a wani kazamin kwanton bauma da suka yi masu.
Vanguard ta rahoto a ranar Talata ne wasu ‘yan bindiga da ba a san ko su waye ba, suka kai hari tare da kashe jami’an tsaro akalla takwas, tare da kona motoci biyu a jihar Imo.
Wani ganau ya shaida wa manema labarai cewa lamarin ya faru ne da misalin karfe 11:30 na safe a Oriagu, daura da reshen Aba da ke karamar hukumar Ehime Mbano a jihar Imo.
Jami’an tsaron da abin ya shafa dai sun hada da sojoji da ‘yan sanda da kuma jami’an tsaron farin kaya na Najeriya, NSCDC.
Bidiyon harin da aka kai, ya nuna gawarwakin sojoji kusan hudu wadanda ba su da rai a cikin kakinsu da bindigogi.
Haka kuma motocinsu guda biyu suna ci da wuta.
A lokacin da ake gabatar da wannan rahoto, an ce an ba da kariya ga titin da ta isa wurin da lamarin ya faru.
Tashin hankali ya ci gaba da gudana a ciki da wajen al'ummar da abin ya shafa.
A cewar ganau, “Al’amarin ya faru ne kimanin sa’o’i biyu da suka wuce. Da farko na ga motocin Hilux guda biyu a lokacin da suka taso daga Oriagu sun nufi reshen Aba da ke Ehime Mbano.
“Kamar yadda nake magana da ku yanzu motocin Hilux na ci gaba da cin wuta. ‘Yan bindigar sun kona sojojin.
“Tashin hankali yana ko’ina. Mun rufe shagunanmu. Muje gida. Muna ganin jami’an tsaro da yawa.
“Sun tare hanya. Mutane suna gudu zuwa gidajensu. Jama'ar mu na fargabar komai na iya faruwa a yanzu.
“Motar farko, na ga sojoji sama da biyar. A na biyu kuma na ga jami’an tsaro sama da hudu. Sun ce an kashe su duka.”
Har ya zuwa lokacin mika wannan rahoton, jami’in hulda da jama’a na rundunar ‘yan sandan jihar Imo, PPRO, Henry Okoye, bai mayar da martani kan binciken ba.
Published by isyaku.com