Majalisar dokokin jihar Kano ta dakatar da shugaban karamar hukumar Gwale Khalid Ishaq Diso na tsawon watanni uku bisa zargin sayar da kadarorin gwamnati.
Zargin da ake yiwa Diso ya fito ne daga kansilolinsa. Kwamitin riko na majalisar kan harkokin kananan hukumomi da masarautu ne ya gabatar da rahoton a zaman taron da shugaban majalisar, Alhaji Isma’il Jibril Falgore ya jagoranta.
Alhaji Hamza Zubairu Massu ya bayyana cewa kwamitin ya yi nazari sosai kan zarge-zargen da ke kunshe a cikin karar da ‘yan majalisar Gwale 6 daga cikin 10 suka shigar. Zarge-zargen da ake yiwa shugaban da aka dakatar sun hada da sayar da kadarorin gwamnati ba bisa ka'ida ba da kuma daukar mataki ba tare da tuntuba ba.
Majalisar ta umurci mataimakin shugaban majalisar da ya karbi ragamar tafiyar da harkokin majalisar har sai an kammala bincike.
Published by isyaku.com