Rundunar ‘yan sandan jihar Neja ta kama wasu mutane biyar da kokon kan dan Adam saboda dalilan yin tsafi.
Wadanda ake zargin sun shaida wa ‘yan sanda cewa wani Alfa ne ya bukaci su kawo kokon kan.
Kakakin rundunar, DSP Wasiu Abiodun, ne ya bayyana hakan a wata sanarwa da ya fitar a ranar Juma’a, 22 ga watan Satumba.
Abiodun ya ce, an kama biyu daga cikin wadanda ake zargin Isah Mohammed mai shekaru 26 da kuma Idris Mohammed mai shekaru 28 da ke kauyen Sakpe da ke karamar hukumar Edati, inda suka kai su ga sauran mutane uku.
Sanarwar ta ci gaba da cewa: “A ranar 11 ga watan da muke ciki da misalin karfe 12:30 jami’an wata ‘yar uwar hukumar tsaro, yayin da suke sintiri na yau da kullun a kan hanyar Bida zuwa Minna, sun tare wata mota kirar Mitsubishi Lancer, kuma a ci gaba da binciken fasinjojin. , an kama mutane biyu da ake zargi.
“Mutane biyun da ake zargin an same su ne da wani kokon kan mutum a nade a cikin jakar Bagco, don haka aka mika wadanda ake zargin zuwa rundunar ‘yan sanda, Bida domin yi musu tambayoyi da kuma ci gaba da bincike.
“A yayin da ‘yan sanda ke gudanar da bincike, wadanda ake zargin sun ce sun samo kokon kan mutum ne daga kauyensu, kuma sun ambaci wasu mutane uku da suka taimaka wajen tono kabarin da aka tono kokon; Ibrahim Jiya 18, Suleiman Usman 22, Abdullahi Usman 24, duk suna zaune a adireshin da muka ambata a sama.
“An kuma kama wadanda ake zargin su uku kuma sun kara da cewa an tono kokon kan daga makabartar kauyen Sakpe kuma na wani Ndako Daniyan ne da ya rasu shekaru uku da suka gabata a kauyen".
Yan sanda na ci gabada bincike.
Published by isyaku.com