Jami’an rundunar ‘yan sandan jihar Filato sun kama wani Likita bisa zarginsa da cire sassan jikin wata mata da ke jinya a asibitinsa da ke Jos babban birnin jihar.
Leadership ta ruwaito cewa an kama likitan ne biyo bayan korafin da mijin matar, Alhaji Kamal ya kai wa ‘yan sanda.
Ya zargi wani Likita da cire koda daya daga cikin kodar matarsa tare da jawo mata ciwo mai tsanani a cikin shekaru biyar da suka wuce. Ya shaida wa ‘yan sanda cewa, a wani lokaci a shekarar 2018, matar sa, Kehinde ta yi korafin fama da ciwon ciki, inda aka garzaya da ita asibitin Likitan da ke unguwar Nasarawa Gwong da ke karamar hukumar Jos ta Arewa inda ya gaya wa mijin cewa ta kamu da ciwon ciki sakamakon Appendix wanda ya fashe kuma ana buƙatar tiyata na gaggawa.
“Kimanin shekaru takwas da suka wuce, mahaifiyata ba ta da lafiya don ta ziyarci Dr. Nuhu Kekere na asibitin Murma da ke unguwar Nasarawa Gwong a karamar hukumar Jos ta Arewa kuma a lokacin da nake zuwa ganin mahaifiyata a asibiti, muka saba da Likitan.
Lokacin da matata ta yi rashin lafiya a 2018, tana korafin ciwon ciki mai tsanani, mahaifiyata ta ƙarfafa mu kai ta wurin saboda matata ta kasance tana bin mahaifiyata don ganin Likita lokacin da mahaifiyata ba ta da lafiya. Yayin da muka isa wurin, Likitan ya yi scanning, ya ce matata ta samu fashewar Appendix, kuma dole ne a yi mata aiki nan take, ya kuma bukaci mu biya N140,000.
Likitan ya tambaye ni ko nawa nake da shi, sai na ce Naira 80,000, baya ga sauran kudaden da ake biya na magunguna amma bayan tiyatar, matata na kokawa kan ciwon da ke damunta, sai mutumin ya rika karbar kudi daga gare ni tsawon wadannan shekaru. A ranar da Likitan ya gudanar da aikin, ya fara aikin ne tun daga karfe 12 na rana har zuwa karfe 8 na dare, kuma tun shekaru biyar da suka wuce, matata ta yi ta korafin ciwon ciki mai tsanani. Na ci gaba da kaita asibitin Likitan don bana son canza Likitan da ya fara kula da jinyar matata. Yayin da ta ci gaba da fama da radadi, sai na yanke shawarar zuwa asibitin koyarwa na Jami’ar Jos, JUTH a kwanakin baya inda muka gano an cire kodar matata daya.
Mun kai rahoton lamarin ga ‘yan sanda a Nasarawa Gwang kuma an kama Likitan kwanaki biyu da suka wuce. An mika karar zuwa ga kwamishinan ‘yan sanda,” inji shi
Da yake tabbatar da kamun, Kakakin rundunar ‘yan sandan jihar, DSP Alfred Alabo, ya ce Likitan na tsare ne yayin da ake ci gaba da bincike don gano laifinsa da nufin gurfanar da shi a gaban Kotu.
Published by isyaku.com