Fitaccen jarumin Kannywood, Abdullahi Shuaibu wanda aka fi sani da Karkuzu ya makance a lokacin da yake fama da wata cuta.
Jarumin wanda a yanzu yake neman taimakon kudi, yana fama da rashin lafiya tun watan Disambar 2020. Da yake zantawa da Daily trust, Karkuzu ya ce;
“Yanzu ni makaho ne yayin da nake magana da ku. Ina matukar bukatar taimakon kudi. Ba ni da abincin da zan ci da ciyar da iyalina.
“Gidan da nake zaune a ciki yanzu za a sayar da shi. Idan sun sayar da wannan gidan, ban san inda zan dosa ba. Don haka ne nake neman taimako daga ’yan Najeriya masu kishi da su kawo min agaji. Aƙalla ƴan Najeriya su taimaka min siyan wannan gidan da nake zaune.
“Na fuskanci tiyata sau biyu, amma a karshe likitoci sun ce glaucoma ce, kuma ba zan sake gani ba. Na yarda da hakan a matsayin makoma ta ta kaddara. Amma ya kamata ’yan Najeriya su taimaka mini, su saya min gidan nan, da abinci.”
Shuaibu ya fara fitowa a masana'antar nishadantarwa ta Hausa a shekarun 1980 tare da shahararriyar wasan kwaikwayo mai suna Karkuzu na Bodara wanda ya sanya ake masa lakabi da Karkuzu.
Published by isyaku.com