Duniya labari: Ganduje ya gabatar da rahoton mika mulki ga magajinsa

Gwamna Abdullahi Ganduje na jihar Kano ya gabatar da rahoton mika mulki na shekarar 2023 ga zababben gwamnan jihar, Malam Abba Yusuf.

 Hakan na kunshe ne cikin wata sanarwa da babban sakataren yada labarai na zababben gwamnan, Alhaji Sanusi Dawakin-Tofa ya fitar ranar Laraba a Kano. PM News ya rahoto.

 A yayin wani dan takaitaccen taro da aka yi a dakin taro na gidan gwamnatin Kano na Ante Chamber, Ganduje wanda ya samu wakilcin sakataren gwamnatin jihar, Alhaji Usman Alhaji, ya jaddada kudirinsa na ganin an samu sauyi a ranar 29 ga watan Mayu.

 Ya bukaci gwamnati mai zuwa da ta yi nazari sosai kan rahoton mika mulki tare da bayar da ra'ayi idan ya cancanta.

 Gwamna Ganduje ya yabawa mambobin kwamitin mika mulki na gwamnati da suka fitar da kundila uku na rahoton da ya kunshi dukkan sassan jihar.

 A nasa jawabin, zababben gwamnan wanda kuma shugaban kwamitin mika mulki na jam’iyyar NNPP, Dakta Baffa Bichi ya wakilta, ya bayar da tabbacin cewa kwamitin nasa zai kai rahoto ga gwamna mai jiran gado, sannan ya koma tare da lura, idan akwai.

 "A wannan lokaci, muna da sa'o'i 105 kacal don mika mulki a hukumance a jihar Kano, don haka muka himmatu wajen ganin mun kawo karshen cikas domin amfanin Kano da al'ummarta," in ji Bichi.

 Ya ce za a bayyana cikakken bayani game da bikin kaddamarwar bayan an cimma wasu yarjejeniyoyin da aka kulla tsakanin gwamnatoci masu barin gado da masu jiran gado.

BY isyaku.com