Gwamna Abdullahi Umar Ganduje ya ce Allah ne kadai ya san wanda zai mika a ranar 29 ga watan Mayu.
Gwamnan ya bayyana haka ne a lokacin da yake kaddamar da wasu ayyukan tituna a jihar. Daily trust ta rahoto.
Hukumar Zabe Mai Zaman Kanta ta Kasa (INEC) ta bayyana dan takarar jam’iyyar New Nigeria Peoples Party (NNPP), Yusuf Abba Kabir a matsayin wanda ya lashe zaben gwamna a jihar tare da ba shi takardar shaidar cin zabe.
Jam’iyyar All Progressives Congress (APC) mai mulki ta caccaki sakamakon zaben inda ta maka INEC da NNPP kotu kan ayyana dan takarar gwamnan New Nigeria People Party (NNPP) a matsayin zababben gwamna.
Sai dai a watan Afrilu Majalisar zartaswar Jihar Kano ta kafa kwamitin mika mulki mai mutane 17 domin mika sandar ga gwamnati mai jiran gado a jihar.
Majalisar ta kuma amince da wani karamin kwamiti mai mutum 100 wanda za a zabo kundin tsarin mulki daga ma’aikatu da hukumomi daban-daban (MDAs).
Amma da yake kaddamar da ayyukan tituna a ranar Laraba, Gwamna Ganduje ya ce, “Ya zama al’ada gwamnati ta gaji ayyuka. Muka gaji wasu muka kammala su; kuma a matsayinmu na gwamnati muna barin wasu ayyuka ga gwamnati mai zuwa. Allah ne kadai ya san gwamnatin da zan mika mulki ga APC ko NNPP.”
BY ISYAKU.COM