Akalla mutane 11 ne suka mutu sakamakon gubar abinci a kauyen Ikobi da ke karamar hukumar Apa ta jihar Benue. Jaridar vanguard ta ruwaito.
An tattaro cewa wadanda lamarin ya rutsa da su sun rasa rayukansu bayan sun ci abinci da ya gurbata da sinadarai masu illa.
A cewar wata majiya a yankin, wadanda suka mutu daga ranar Litinin din da ta gabata a cikin wannan bala’in cikin mako guda sun hada da Adi Ale, Ochefije Ojo, Maria Ojo, Aipu Ochefije da Aboyi Ochefije.
Sauran sune Mary Ochoyoda da Ehi Abu, Blessing Abu, Peace Ochoyoda, Ojochono Daniel da Favor Edoh.
Majiyar wadda ta nemi a sakaya sunanta ta bayyana cewa yayin da shida daga cikin wadanda suka mutu a rana daya, wasu biyar kuma sun mutu kwanaki kadan.
Ya bayyana cewa daya daga cikin ‘yan uwa da suka rasu, Ochoyoda Abu, ya rasa matarsa (Maryamu) da ’yan’uwa mata biyu (Ehi da Blessing) da kuma wata ‘yarsa (Peace) a wannan mummunan lamari.
Ya ce, “Wannan abin bakin ciki ne a gare mu duka a Ikobi. Da farko mutane ba su fahimci abin da ke faruwa ba lokacin da mutanen suka fara mutuwa.
“Daga baya an gano cewa duk wadanda suka mutu sun ci abincin da ya fito daga tushe daya, wanda aka adana da sinadarai masu hadari.
“Binciken da muka samu ya nuna cewa daya daga cikin wadanda abin ya shafa ta dafa wa mutane abinci sannan ta ba da wani bangaren garin masarar da ta samu daga gidan makwabci ga wasu mutane domin su ci abinci.
“Abin takaici, kusan duk wanda ya ci daga cikin abincin da aka yi da garin masarar ya mutu a cikin bala’in.
“Lokacin da lamarin ya faru, nan take aka tura kwararru daga ma’aikatar lafiya ta jihar domin su binciki wannan bakon mutuwar.
“Duk da cewa sakamakon binciken bai fito ba, amma mun san guba ne saboda duk wadanda suka ci abincin sun mutu ko kuma ba su da lafiya. "
Da aka tuntubi jami’ar hulda da jama’a na rundunar ‘yan sandan jihar Binuwai, SP Catherine Anene, ta tabbatar da faruwar lamarin.
Ta bayyana cewa, “kusan watanni uku da suka gabata an sami wani mutum da ya mutu sakamakon gubar abinci a wani gida a yankin Ikobi.
“Watani kadan bayan faruwar lamarin, a daidai ranar 14 ga watan Nuwamba, wata mata wadda mai yiwuwa ’yar uwa ce ga mamacin, ta je gidan marigayin don share gidan.
“Ta sami kayan abinci a can ta kawo gidanta don ta dafa.
“Bayan ta dafa abincin, ta yi wa wasu mutane hidima ta dafa abincin ta basu daga garin masarar da ta samo daga gidan mamacin, bayan sun ci abincin, mutane 12 sun kamu da rashin lafiya kuma an kai su asibiti.
“Amma bakwai daga cikinsu sun mutu sannan sauran biyar da aka garzaya da su asibiti sun tsira. Har yanzu ana ci gaba da bincike.”