Hotunan Asiwaju Bola Ahmed Tinubu yana Saklah yayin da yake zaune akan kujera ya janyo cece-kuce daga 'yan Najeriya a shafin Twitter.
Legit.ng ta ruwaito cewa martanin ya biyo bayan hotunan Tinubu, dan takarar shugaban kasa na jam’iyyar APC, yayin da yake gudanar da Sallar Eid-el-Kabir a babban masallacin Legas da ke Oluwole a ranar Asabar, 9 ga watan Yuli.
Gboyega Akosile, Babban Sakataren Yada Labarai na Gwamnan Jihar Legas, Babajide Sanwo-Olu ne ya raba hotunan a shafin Twitter.
"Kuma me yasa baba baya zama kamar sauran?", Akinrinmade Isaac , @activeKolins, ya tambaya.
Wani mai amfani da Twitter, Endbadpolitics, @endbadpolitics, ya mayar da martani:
"Me ya sa ya zauna !!!! Wannan mutumin ba shi da lafiya"
Zama Lokacin Sallah: Abin da Malaman Musulunci suka fada
Da yake magana kan hukuncin da Musulunci ya yanke kan tsarin Sallah, wanda ya kafa kungiyar Al-Mustofiyya Islamic Society of Nigeria (MISN), Ustaz Maisuna M. Yahya, ya ce daidai ne mutum ya zauna don gudanar da Sallar Musulmi a Masallatai ko a gida, Daily trust ta ruwaito.
Malamin addinin Musuluncin na mayar da martani ne ga wani lamari makamancin haka a lokacin da wasu ‘yan Najeriya suka tambayi dalilin da ya sa shi ma shugaban kasa Muhammadu Buhari ke zaune kan kujera yana Sallah.
A cewar Ustaz Yahya, yanayin da ake yi a cikin salloli ko nafila kamar yadda shari’ar Musulunci ta tanadar, ya danganta da yanayin lafiyar kowane mutum.
“A tsaye, idan mutum yana da iyawa, inda ba shi iyawa watakila saboda rashin lafiya, rauni, juwa da sauransu, sai a zauna, ko akan tabarma, ko a kujera a gudanar da Sallah.
“Duk da haka, idan matakan nan biyun da aka ambata sun gagara, to, mutum na iya kwanciya a gefen dama, hagu, cikinsa ko bayansa don tsayar da sallarsa,” in ji Yahaya yayin da yake ambaton ayar Alkur’ani mai girma, Surah Al. Imran aya ta 191 (Q3:191).
Shima da yake mayar da martani kan lamarin shugaba Buhari, babban Limamin Masallacin Juma’a na Fouad Lababidi Central Mosque, Wuse, Abuja, Dokta Tajudeen Bello Adigun, ya ce ya dace a rika yin sallah a zaune.
A cewarsa, zama a kan kujera yayin da ake yin Sallah ya dace da Shari’a, kuma Shari’a ba ta sanya al’amura su wahala ba sai don saukin al’amura ga Musulmi da ‘yan Adam.
Haka nan, bisa ga Tambaya da Amsa ta Musulunci (islamqa.info), karkashin jagorancin Sheik Muhammad Saalih al-Munajjid:
“Tsaya da ruku’u da sujjada ginshikai ne ko kuma abubuwan da ake bukata na Sallah, duk wanda ya iya yin su ya wajaba ya yi su kamar yadda aka shar’anta a shari’ah.
"Duk wanda ya kasa yin su saboda rashin lafiya ko tsufa, sunna ce ya zauna a kasa ko akan kujera".