Wani dan Najeriya mai shekaru 39 mai suna Alika Ogorchukwu, ya mutu bayan da wani dan kasar Italiya ya lakada masa duka a kan titunan birnin Civitanova Marche da ke lardin Macerata na yankin Marche na kasar Italiya. Shafin isyaku.com ya samo.
A wata sanarwa da ofishin jakadancin Najeriya da ke Italiya ya fitar, ta ce dan kasar Italiyan ne ya kai wa marigayin hari a kan wata hanya mai cike da cunkoson jama'a masu wucewa.
Sanarwar ta kara da cewa Jakadan Najeriya a Italiya, Mfawa Omini Abam, ya yi Allah wadai da kisan. Ya ce a halin yanzu ofishin jakadancin Najeriya yana hada kai da hukumomin Italiya da abin ya shafa don tabbatar da an yi adalci da kuma bayar da taimako ga iyalan mamacin.