Wata babbar kotun jihar Ondo da ke zama a Akure ta yanke wa wani magidanci mai suna Ojo Daniyan mai shekaru 50 hukuncin kisa ta hanyar rataya bisa samunsa da laifin kashe matarsa, Daniyan Dorcas. Kafar labarai na isyaku.com ya samo.
Damiyan ya aikata laifin ne a ranar 14 ga watan Satumba, 2019, a titin lrese dake kauyen Shagari a Akure.
Ya kulle gidan aurensu ya banka wuta a lokacin da matarsa ke ciki tana barci bayan ya zarge ta da cewa ba ta ba shi labarin mota da filaye uku da ta mallaka ba.
An tuhumi Damiyan da laifin konewa, kisa da kuma nakasa domin aikata laifi.
Daga cikin shaidun da suka bayar da shaida kan lamarin har da dan uwan mariganyar, Adeniyi Samuel.
Adeniyi ya ce ‘yar uwarsa marigayiya ta bayyana masa cewa ta sayi wannan kadarorin da sunan ta ne saboda tana tsoron mijin ya watsar da su ba tare da saninta ba.
Yayin da yake yanke hukuncin a ranar Alhamis, 7 ga watan Yuli, 2022, Mai shari’a A. O Adebusoye, ya ce masu gabatar da kara sun tabbatar da karar da ake yi wa Ojo ba tare da wata shakka ba kuma ta yanke masa hukuncin da ya dace.
A cewar mai gabatar da kara karkashin jagorancin Helen Falowo, ana tuhumar wanda ake tuhuma da laifin konewa, kisa da kuma nakasa wajen aikata wani laifi a lokacin da lamarin ya faru a ranar 14 ga Satumba, 2019, a titin lrese a kauyen Shagari da ke birnin Akure.
An kuma zargi Daniyan da gurgunta hanya daya tilo da ta bi ta kubuta kafin ya kone ta, domin kada ta kubuta ta kofar gida.