Filin wasa na Haliru Abdu da ke garin Birnin kebbi mazaunin Gwamnatin jihar Kebbi ya cika makil da magoya bayan jam'iyar ta APC tare da wadanda suka canja sheka daga jam'iyar PDP zuwa APC a wani biki na wankan tsarki da shugaban jam'iyar na APC na kasa tare da na jihar Kebbi Alh. Attahiru Maccido karkashin jagorancin Gwamnan jihar Kebbi Sanata Atiku Bagudu ya gudanar.
Duk wani babban jami'in Gwamnatin jihar Kebbi ya halarci taron, haka zalika manya da kananan 'yan siyasa a fadin jihar Kebbi sun hallara.
Tsohon gwamna Alh. Sa'idu Dakingari ya ce sun dawo jam'iyar APC ne sakamakon adalcin gwamnatin shugaba Muhammadu Buhari wajen shirye shiryensa da suka kawo ci gaba,dogaro da kai tare da samar da tsaro. Haka zalika ya ce adalci, da ayyuka tukuru na ciyar da jihar Kebbi gaba da Gwamna Abubakar Atiku Bagudu ke yi ya sa suka dawo jam'iyar APC.
