An yi jana'izar matar aure mai shekaru 42, Ammi Adamu Mamman, wacce ake zargin mijinta, Abubakar Musa mai shekaru 43 ya kashe a jihar Yobe.
Kakakin Rundunar ’Yan sandan Jihar, DSP Dungus Abdulkarim, ya ce lamarin ya faru ne a Sabuwar Bra-Bra Estate da misalin karfe 4:48 na safiyar ranar Alhamis, 4 ga watan Janairu, 2024.
A cewar Abdulkarim, marigayiyar tana gado daya da mijin nata ne a lokacin da aka caka mata wani abu mai kaifi a wuyanta, wanda ya haifar da zubar jini mai tsanani wanda ya yi sanadiyar mutuwarta.
An yi jana'izar Ammi tare da wata mata a ranar Talata 9 ga watan Janairu a fadar Sarkin Pataskum dake Potiskum.
A halin da ake ciki, Gwamnan jihar Yobe, Mai Mala Buni, ya sha alwashin cewa duk wanda ke da hannu a mutuwar Ammi, zai fuskanci fushin doka.
Gwamnan a cikin wata sanarwa da ya fitar ta hannun DG, Press, and Media Affairs, Mamman Mohammed, ya bayyana rasuwar Ammi a matsayin babban rashi ga iyalanta, al’ummarta da kuma jiharta.
“Gwamna Buni ya sake ta’aziyya ga iyalan Ammi Adamu Mamman, wanda ta rasu a wani yanayi na ban mamaki kuma aka binne ta a yau,” in ji sanarwar.
"Allah ya gafarta mata kurakuranta, ya sakata a Aljannatu firdaus, kuma ya ba masoyanta karfin gwiwar jure rashin.
“Gwamnan ya jaddada kiran sa ga jami’an tsaro da su bankado duk wani bayani da ke tattare da yanayin mutuwar ta
“Ya kuma ba da tabbacin cewa duk wanda ye da hannu a cikin mutuwarta zai fuskanci fushin doka, yana mai cewa babu wanda ke da hannu a cikin lamarin da zai tsira daga fuskantar dokar".
From ISYAKU.COM