Rundunar ‘yan sandan jihar Yobe ta kama wani mutum mai suna Abubakar Musa mai shekaru 43 da haihuwa da laifin kashe matarsa Ammi Mamman a Damaturu.
Kakakin Rundunar Yan sandan jihar, Dungus Abdulkarim, wanda ya bayyana hakan a cikin wata sanarwa da ya fitar, ya ce lamarin ya faru ne a Sabuwar Bra-Bra Estate da misalin karfe 4:48 na safiyar Alhamis, 4 ga Janairu, 2024.
Abdulkarim ya ce wanda ake zargin yana kan gado daya da matar ne a lokacin da aka caka mata wani abu mai tsini a wuyanta wanda ya yi sanadin zubar da jini mai yawa wanda ya kai ga mutuwarta.
Ya ce jami’an tsaro na ‘yan sanda suna yi wa mutumin tambayoyi domin bayyana yadda lamarin ya faru.
A cewarsa, an kai rahoton lamarin a hedikwatar ‘yan sanda ta C, Damaturu, kuma a halin yanzu jami’an tsaro na CID da na rundunar ‘yan sandan na ci gaba da yi masa tambayoyi.
A halin da ake ciki, wani mazaunin yankin da ya nemi a sakaya sunansa ya shaida wa manema labarai cewa wanda ake zargin bayan ya aikata laifin ya garzaya ya kira makwabcinsa domin ya taimaka masa.
“Bayan ya aikata laifin, sai ya garzaya ya shaida wa makwabcinsa cewa matarsa na zubar da jini. Don haka, sai suka samu motar daukar marasa lafiya suka kai ta asibiti, inda aka tabbatar da mutuwar ta,” inji shi.
From ISYAKU.COM