Jami’an rundunar ‘yan sandan jihar Bayelsa sun kama daya daga cikin wadanda suka kashe SP Bako Angbashim, tsohon jami’in ‘yan sandan shiyya ta Ahoada, jihar Ribas.
A cikin wata sanarwa da aka saki a yau 18 ga watan Nuwamba, kakakin rundunar, CSP Buswat Asinim, ya ce wanda ake zargin, Onyekachi Ikowa', 43, wanda shi ne na biyu a matsayin kwamandan TuBaba na kungiyar asiri ta Iceland, an kama shi ne a ranar 18 ga watan Nuwamba. 2023, bisa ingantattun bayanan sirri da ke nuna cewa yana boye a Yenagoa bayan ya shiga cikin kisan gillar da aka yi wa Marigayi SP Bako Angbashim, a cikin Satumba 2023.
A halin da ake ciki, kwamishinan ‘yan sandan jihar Bayelsa, CP Francis Iduh, ya umarci ‘yan sanda da su kamo duk wata tawagarsa da ke boye a jihar Bayelsa, ya kuma jaddada cewa rundunar ta Bayelsa da ke karkashin sa ba za ta zama mafakar masu aikata laifuka ba.
LIB ta ruwaito cewa wasu da ake zargin yan kungiyar asiri ne a ranar Juma’a, 8 ga watan Satumba, sun harbe SP Bako Angbashim. Marigayin shugaban ‘yan sandan da mutanensa sun yi artabu da wani fitaccen shugaban kungiyar asiri a yankin da ake kira ‘’Tubaba’’ inda aka ce harsashi ya kare wa Yan sanda, ‘yan kungiyar asiri sun kama DPO din da ya samu raunukan harbin bindiga a yayin musayar wuta.
A cikin wani faifan bidiyo da ake kyautata zaton ’yan kungiyar asiri ne suka fitar, an ga gawar Mista Bako da aka yanke aka yi mata gunduwa-gunduwa, yayin da aka ji wata murya tana masa ba’a.