Wasu ‘yan bindiga sun yi garkuwa da ‘yan uwan wani fitaccen dan siyasa kuma dan takarar Gwamna, Umar Tata su shida a garin Dutsinma, hedikwatar karamar hukumar Dutsinma ta jihar Katsina. Shafin labarai na isyaku.com ya samo.
An tattaro cewa ‘yan bindigan sun kai farmaki gidan wani Alhaji Babangida Abdullahi da misalin karfe 12 na daren ranar Asabar, 20 ga watan Agusta, inda suka tafi da wadanda abin ya shafa.
Kamar yadda rahoton Daily Trust ya ruwaito, wadanda lamarin ya rutsa da su bakin aure ne na Alhaji Abdullahi, wanda gidansa ke kusa da gidan Tata, wanda ya nemi tikitin takarar Gwamna a karkashin jam’iyyar APC mai mulki a zaben fidda gwanin jam’iyyar da aka gudanar kwanan nan.
Wata majiya mai tushe ta shaida wa Daily trust cewa ana zargin masu ba da labari sun taka rawa duba da yadda lamarin ya kasance.
“Matar da aka yi garkuwa da ‘ya’yanta akasari ‘yar uwar dan siyasar ce (Tata) kuma yadda maharan suka shiga gidan kai tsaye suka yi awon gaba da matan, abin mamaki ne matuka,” inji shi.
Wani mazaunin garin Dutsinma da ya nemi a sakaya sunansa ya ce da farko ‘yan ta’addan sun yi garkuwa da mutane tara a Unguwar Kudu kwatas din garin amma daga baya aka sako mutane uku.
"Da farko sun yi watsi da wata tsohuwa wadda ba za ta iya tafiya da wani karamin yaro da ke ci gaba da kuka ba, sannan da suka ci gaba da tafiya sai suka bar wata mata da ta gaji," in ji mazaunin.
“Kwanan nan akwai lokacin da ‘yan fashin suka zo Dutsinma kwana hudu a jere suna garkuwa da mutane, lamarin ya kara ta’azzara a ‘yan kwanakin nan kuma abin ya dame mu sosai,” inji majiyar.
Haka kuma, wani basaraken gargajiya da ba ya son a buga sunansa ya tabbatar da faruwar lamarin.
“Mun dawo ne daga gidan da lamarin ya faru, inda muka jajanta wa iyalan wadanda abin ya rutsa da su, a gaskiya abin ya fara daukar hankali (’yan fashi) don haka muna kira ga jami’an tsaro da su tashi tsaye kan wannan lamari,” inji shi.