A ranar Litinin din da ta gabata ne wasu ’yan daban siyasa suka kai wa ‘yan Majalisar dokokin jihar Bauchi hari a gidansu da ke masaukinsu, inda suka lalata motoci da tagogi a lokacin da suke gudanar da wani taro a jihar.
Kamfanin dillancin labarai na Najeriya (NAN) ya ruwaito cewa Majalisar ta fada cikin rikicin shugabanci inda a ranar Alhamis din da ta gabata mambobi 22 suka amince da shugaban Majalisar, Mista Abubakar Suleiman da kuma manyan hafsoshin Majalisar.
Mista Babale Abubakar, shugaban masu rinjaye na Majalisar, ya shaida wa manema labarai ranar Litinin a Bauchi cewa, harin na baya-bayan da ya faru da misalin karfe 4 na yamma a daidai lokacin da ‘yan Majalisar ke gudanar da taro, ya yi sanadin jikkata shida daga cikinsu.
“Akalla motoci shida maharan suka lalata da su kuma suka fasa gilashin taga.
"Sun fi 100 kuma suna dauke da bindigogi, sanduna da ashana," in ji shi.
“Abin ban tsoro ne. Wasu daga cikin mu sun gudu zuwa kofar fita kuma sun ji rauni sosai,” in ji shugaban masu rinjaye.
Abubakar ya ce ba da jimawa ba mai ba gwamnan jihar, Sani Mohammed Burra shawara na musamman kan harkokin Majalisar dokoki ta kasa, ya bar masu cewa ‘yan bangar siyasa sun tayar da hankalinsu.
A cewarsa, daya daga cikinsu ya rike ni a wuya ya tambaye ni ko har yanzu ni shugaba ne a gidan.
“Ya ce a shirye suke su kashe ni. Mambobi shida sun samu raunuka a yayin aikin. An kai wasu asibiti kuma na yi imanini za su Sami lafiya.
“Al’amari ne mai ban tsoro. Abin bakin ciki ne,” inji shi.
Sai dai ya ce an kai rahoton lamarin ga kwamishinan ‘yan sandan jihar.
Da yake mayar da martani kan lamarin, Burra ya raba kansa da bangaren zartarwa daga harin.
Mai taimaka wa Gwamnan ya yi kira ga jami’an tsaro da su binciki lamarin, su kama su kuma gurfanar da wadanda ke da hannu a wannan aika-aika domin ya zama dakile.