Birnin kebbi: Yaron da aka daure a turakun dabbobi a Badariya ya samu lafiya Gwamnati ta mayar da shi ga iyayensa (Hotuna)

byIsyaku Garba -December 08, 2021

0

Gwamnatin jihar Kebbi ta mayar da Jibril Aliyu ga iyayensa. Jibril shi ne yaron da kishiyoyin mahaifiyarsa suka daure a turakun dabbobi a Unguwar Badariya a garin Birnin kebbi shekara daya da ta wuce. Shafin isyaku.com ya wallafa.

Gwamnatin jihar Kebbi ta dauki nauyin jinyar Jibrin har zuwa wannan lokaci.

Kazalika mun samo cewa akalla Likitoci 20 sun duba lafiyar Jibrin a tsawon lokacin da yake karkashin kulawar Gwamnati dangane da harkar lafiyarsa.

Sai dai babban Kotun Majistare da ta yi zamanta a Birnin Kebbi ranar 29 ga watan 7, 2021, karkashin Mai sharia Mungadi, ta daure Mahaifin Jibrin mai suna Aliyu Umar tsawon shekara daya a Kurkuku karkashin doka ta 238 na Penal code ba tare da zabin biyan tara ba sakamakon kama shi da laifin cin zarafin yaron.

Yanzu haka yaron ya murmure kuma an mayar da shi wajen iyayensa.