Yadda BBC ta sa rayuwata ta sauya daga mata-maza zuwa cikakkiyar mace'


Aisha, wadda ba sunanta na yanka kenan ba, ta shiga rudu tun bayan tasowarta zuwa farkon shekarar 2021 saboda irin tsangwamar da ta fuskanta a cikin al'umma sakamakon kasancewarta mata-maza.

To sai dai a 'yan watannin baya gwamnatin jihar Kano ta share wa Aisha hawaye bayan da ta dauki nauyin yi mata aiki domin mayar da ita cikakkiyar mace.

Yanzu haka dai Aisha mai shekara 22 ta fara zuwa makarantar gaba da sakandare inda take karantar harsunan Turanci da Larabci a kwalejin ilimi ta jihar Kano, sabanin a baya inda Aisha ba ta iya shiga cikin jama'a.

Wani abun farin ciki a tattare da Aisha a yanzu haka shi ne yadda ta samu saurayin da zai aure ta.

" Insha Allahu nan ba da jimawa ba za mu yi aure saboda na samu saurayi. Ba kamar a baya ba lokacin da jama'a suke guje mini.

Akwai lokacin da har an sa min rana ma da wani amma da aka shaida masa cewa ga larurar da ke damu na sai aka zuga shi ya fasa."

Rawar da BBC ta taka wajen sauya rayuwata

"Tun da na yi hira da BBC gwamnan Kano ya ji irin halin da masu irin larurata ke ciki sai ya dauki nauyin yi mana aiki a Sokoto ni da sauran mutum shida. Muna fatan Allah ya saka wa gwamnati da BBC", in ji Aisha.

BBC dai ta sha yin rahotanni a kan masu larurar mata-maza da manufar nusar da al'umma dangane da irin halin da masu larurar ke ciki.

Sashen Hausa na BBC na ci gaba da kasancewa tsani ga irin wadannan mutanen da ma sauran marasa galihu.

Wannan layi ne

Yadda rayuwa ta kasance min kafin a mayar da ni cikakkiyar mace

"Ni dai an haife ni da al'aurar namiji da mace kuma mahaifana tun a lokacin suka so su nema min magani amma sakamakon rashin wadata hakan bai samu ba", in ji Aisha.

Kasancewar ba a yi wa Aisha magani ba a kan lokaci yasa gabban jinsin guda biya suka ci gaba da girma a jikinta duk da cewa ta fi karkata ga mace.

An wayi gari Aisha tana al'ada kamar kowacce mace shiga shekarun balaga na 'ya mace amma kuma ko kirgar dangi babu a tare da ita sannan kuma muryarta ta yi kaushi irin ta maza.

"Kullum ina cikin gida a daki saboda takaicin abin da jama'a za su ce min idan na fita waje. Hakan ne ya sa na daina zuwa makaranta da duk wani abu da zai hada ni da jama'a."

Babban burin Aisha shi ne ganin ta wayi gari ta ga 'ya'yanta wanda kuma tuni ta dauki hanya kasancewar ta samu saurayi kuma har ya tura mahaifansa domin a nema masa inda kuma tuni aka ba shi.

Wani karin burin da Aisha ke da shi shi ne samun ilimin zamani wanda kuma tuni ta dauki hanyar.

Rahotun BBC Hausa

Previous Post Next Post

Reported by ISYAKU.COM

Latsa nan ka shiga group din mu domin samun Labaran mu ta Whatsapp 
https://chat.whatsapp.com/EsSeIwnS18mKkhQwHP3mFx

Domin aiko labari, shawara ko tuntubarmu 
LATSA NAN 

SHAFUKANMU NA SADA ZUMUNTA 

Facebook.com/isyakulabari