Ma’aikatar noma da raya karkara ta tarayya ta sanar da ‘yan Najeriya game da bullar cutar Anthrax a wasu kasashe makwabta na yankin yammacin Afirka.
Bayan faruwar lamarin, ma’aikatar ta shawarci ‘yan Najeriya da su daina cin fatu (ponmo), nama da naman daji saboda suna da matukar hadari har sai an shawo kan lamarin. Daily trust ta rahoto.
Wata sanarwa mai dauke da sa hannun babban sakataren ma'aikatar, Dr Ernest Afolabi Umakhihe, ta ce an fara samun bullar cutar ne a arewacin Ghana mai iyaka da Burkina Faso da Togo lamarin da ya jefa yankin cikin hadari.
“Cutar da ta ci rayukan wasu, cuta ce ta kwayan cuta da ke shafar dabbobi da mutum, wato cutar zoonotic, Anthrax spores ana samun su ta halitta a cikin ƙasa kuma galibi suna shafar dabbobin gida da na daji.”
“Mutane na iya kamuwa da cutar ta Anthrax idan suka yi mu’amala da dabbobin da suka kamu da cutar ko kuma gurbatattun dabbobi. Duk da haka, Anthrax ba cuta ce mai yaduwa ba don haka, ba za a iya kamuwa da ita ta hanyar kusanci da mai cutar ba.
“Alamomin anthrax kamar mura ne kamar tari, zazzabi, ciwon tsoka kuma idan ba a gano cutar ba kuma a yi maganinta da wuri, tana haifar da ciwon huhu, wahalar numfashi, firgita da mutuwa,” sanarwar ta karanta a wani bangare.
Sanarwar ta kuma gargadi jama’a game da kusanci da dabbobin da ba a yi musu allurar cutar Anthrax ba, domin ana iya kamuwa da ita ga mutum cikin sauki ta hanyar shakar kwayar cutar Anthrax da ta hada da mu'ama da dabbobi masu cutarwa, kamar fata da fata, nama ko madara.
BY isyaku.com