Hukumar yaki da sha da fataucin miyagun kwayoyi ta kasa, NDLEA, reshen jihar Sokoto, ta cafke wani da ake zargi da sayar da kwayoyi mai suna Umar Mohammed, Hakimin Ruga a karamar hukumar Shagari. Shafin labarai na isyaku.com ya samo.
Da yake zantawa da manema labarai a ranar Talata, 23 ga watan Agusta, Kwamandan NDLEA a jihar, Adamu Iro, ya ce an kama wanda ake zargin ne biyo bayan binciken sirri da rundunar ta gudanar.
A cewar NAN, Mista Iro ya ce wanda ake zargin, wanda ya kasance mai rike da sarautar gargajiya ya dade a cikin jerin sunayen mutanen rundunar ke sa ido a harkarsu dangane da tu'ammali da miyagun kwayoyi.
“Tun da farko mun damke matarsa dauke da miyagun kwayoyi masu yawa, amma mun sake ta ne bayan wani bincike da muka yi na cewa kayan na mijin ne, don haka Alhamdulillah a ranar Litinin din da ta gabata mun samu nasarar kama shi kuma mun samu kilogiram 436.381. na Cannabis Sativa da kilogiram 1 na Diazepam a gidansa, "in ji Iro.
Kwamandan ya kara da cewa tun daga lokacin ne wanda ake zargin ya amince da aikata laifin tare da sanar da hukumar cewa ya dade yana sana’ar.
Ya ce rundunar za ta tabbatar da yadda ya dace, amma za a gaggauta gudanar da bincike kan lamarin domin gurfanar da wanda ake zargin a gaban kotu.
Iro ya kuma baiwa ‘yan kasar tabbacin cewa hukumar NDLEA ta kudiri aniyar kai samame a duk wuraren da masu safarar miyagun kwayoyi ke yi tare da tabbatar da an gurfanar da su a gaban kuliya.
Ya kuma yi kira ga jama’a da su ci gaba da ba hukumar goyon baya domin ganin ta samu nasarar aikinta na kawo karshen duk wani nau’i na shan miyagun kwayoyi a cikin al’umma.