Yan bindiga sun farmaki wasu gidaje a kauyen Anguwar Maji da ke garin Jere kan babban titin Abuja zuwa Kaduna suka yi awon gaba da mutum 22. Daily trust ta ruwaito.
Jere, wanda ke da iyaka da Tafa-Sabon-Wuse a Jihar Neja, yana kan babbar hanyar Abuja zuwa Kaduna.
Wani mazaunin Anguwar Maji mai suna Shehu Bala, wanda ya tabbatar da faruwar lamarin na baya-bayan nan ta hanyar tattaunawa da wakilinmu ta wayar tarho, ya ce lamarin ya faru ne da misalin karfe 11 na daren Lahadi.
Ya ce ‘yan bindigar da suka zo da yawa sun mamaye wasu gidaje inda suka yi awon gaba da mutane 22 ciki har da mata biyar.
“’Yan bindigar sun zo da adadi mai yawa yayin da wasunsu ke sanye da kakin sojoji.
"Sun yi tafiya gida gida suna tada wadanda abin ya shafa kafin su shiga daji da bindiga," in ji shi.
A cewarsa, ‘yan bindigar sun shafe sama da awa daya suna gudanar da ayyukansu cikin natsuwa a cikin al’umma.
Ya kara da cewa sun fara harbe-harbe ne kawai don tsoratar da mutane daga bin su bayan sun bar al’umma.
Bala, ya ce daya daga cikin mutane 22 da aka yi garkuwa da su ya tsere daga hannun wadanda suka yi garkuwa da shi yayin da ake kai su cikin daji.
Kiraye-kiraye wayar Kakakin Rundunar ’Yan sandan Jihar Kaduna, ASP Mohammed Jalinge, ya kasa samun damar zuwa lokacin hada wannan rahoton.