Wata babbar Kotun jihar Yobe da ke zamanta a Potiskum ta yanke hukuncin kisa ta hanyar rataya ga wani korarren soja, Lance Kofur John Gabriel bisa laifin kashe wani Malamin addinin Islama, Sheikh Goni Aisami.
Kotun ta kuma yanke wa Lance Kofur Adamu Gideon hukuncin daurin shekaru 10 a gidan yari.
Aisami, fitaccen Malamin addinin Musuluncin nan dake garin Gashua, Gideon ya kashe shi a karamar hukumar Karasuwa ta jihar Yobe wanda ya taimaka ya bashi lift a motarsa kyauta a kan hanyarsa ta zuwa Gashua daga Kano a ranar 22 ga Agusta, 2022.
Sojojin Najeriya sun kori sojojin biyu bayan da kwamitin binciken hadin gwiwa da aka kafa tare da hadin gwiwar ‘yan sanda, ta same su da laifin kisan kai.
Mai shari’a Usman Zanna Mohammed wanda ya yanke hukuncin ya yankewa Gabriel hukunci mai lamba N/A13/69/6522, mai alaka da 241 Recce Battalion, Nguru, da Gideon bayan ya same su da laifin kisa da kuma hada baki, bi da bi.
Da yake yanke hukuncin, Mai shari’a Mohammed ya ce bayan da aka yi nazari sosai a kan hujjojin da ke gaban kotun da kuma yadda wadanda ake tuhumar suka kasa bayar da wasu muhimman shaidu da za su tabbatar da ikirarin nasu, an yanke musu hukunci daidai da tanadin da doka ta tanada.
Da aka tambaye shi ko yana da wata hujja, Gabriel ya amsa cewa ya kashe fitaccen Malamin addinin Islama.
Gwamnatin jihar Yobe ta hannun ma’aikatar shari’arta ta gurfanar da mutanen biyu a gaban kuliya.
From ISYAKU.COM