‘Yan sanda sun ce yaron mai suna Dipak Thakor, wasu gungun birai ne suka kashe shi a lokacin da shi da abokansa ke wasa a kusa da wani gidan ibada a Salki, wani karamin kauye da ke yammacin jihar Gujarat, a ranar Talata, 14 ga watan Nuwamba.
A cewar Mail Online, wasu gungun birai sun kai masa hari tare da abokansa, kafin daya daga cikin dabbobin ya caka masa kumbar yatsarsa a cikinsa sakamakon haka hanjin yaron suka fito.
An garzaya da yaron asibiti amma abin takaici ya rasu kafin likitoci su yi masa magani.
'Hanjin sa ya fito a harin. An garzaya da shi zuwa gidansu, daga bisani aka kai shi asibiti inda likitoci suka tabbatar da cewa ya mutu a lokacin da aka isa da shi asibiti,' kamar yadda wani jami'i ya shaida wa kafar yada labaran kasar.
Jami’in ya kara da cewa wannan shi ne hari na uku da gungun birai suka kai a cikin wannan mako kadai.
Jami'in gandun daji Vishal Chaudhary ya ce shi da tawagarsa sun jima suna kokarin kama dabbobin masu hadari.
From ISYAKU.COM