Kotun Majistare ta bayar da belin Malamin Islama da aka garkame a Kurkuku bisa zargin tada zaune tsaye a jihar Arewa

Kotun Majistare ta 1 da ke zamanta a Bauchi, a ranar Talata, ta bayar da belin wani malamin addinin Islama na Bauchi, Sheikh Idris Abdulaziz, kan Naira miliyan 1 tare da mutane uku da za su tsaya masa.

 Kamfanin dillancin labarai na Najeriya (NAN) ya ruwaito cewa, ‘yan sanda sun gurfanar da Abdulaziz a gaban kotu a ranar Litinin da ta gabata bisa tuhumarsa da tada zaune tsaye da kuma tayar da hankalin jama’a.

 Kotun ta ce idan aka yi la’akari da matsayin fitaccen malamin, dole ne daya daga cikin wadanda za su tsaya masa ya zama Hakiminsa, sannan kuma wanda zai tsaya masa na biyu ya kasance babban sakataren din-din-din na gwamnatin jihar Bauchi, kuma zai ba da takardar shaidar mallakar kadarori da bai kasa Naira miliyan biyar.

 Ya kara da cewa wanda zai tsaya masa na uku ya zama malamin addini, wanda dole ne ya kasance abokin aikin wanda ake kara.

 Kotun ta kuma umarci wanda ake kara da wadanda za su tsaya masu da su mika hotunan fasfo din su na baya-bayan nan da sauran hanyoyin tantancewa.

 Alkalin kotun majistare Abdulfatah Sekoni, yayin da yake yanke hukunci kan neman belin, ya ce kotun ba ta samu cikakkun bayanan da ke tattare da shari’ar ba a lokacin da aka fara gabatar da shi a gabanta, don haka aka ci gaba da tsare wanda ake tuhuma a gidan gyaran hali, don ba ta damar yin nazarin rahoton farko na bayanai.  (FIR) da kuma yanayin da ke tattare da lamarin.

 A cewar Sekoni, bayan da aka yi nazari kan shari’ar, ya dace a ba da belin wanda ake kara, kuma rashin yin hakan zai zama rashin adalci.

BY isyaku.com