Wani magidanci mai shekaru 42, mai suna Awelewa, ya yi yunkurin kashe kansa ta hanyar tsallake rijiya da baya, bayan ya yi yunkurin kashe matarsa a jihar Ondo. Shafin labarai na isyaku.com ya samo.
Lamarin ya faru ne a kusa da yankin Powerline da ke Akure, a karamar hukumar Akure ta Kudu.
Kamar yadda jaridar Nigerian Tribune ta ruwaito, an ce mahaifin 'ya'ya hudu ya yi yunkurin yanka matarsa a lokacin da take barci amma 'ya'yansa suka hana shi cikin dare.
An ce Awelewa ya yi wa matar sa yankan rago sosai a cikin lamarin kafin ‘ya’yansa su daga murya. Makwabta ne suka ceto su da suka garzaya da matar zuwa asibiti
Wata majiya da ta yi magana da jaridar ta ce mutumin ya karbi makudan kudade daga hannun matarsa, surukarsa da kuma wasu abokan haya wanda ya kasa biya. Ya bayyana cewa mutumin ya yi rigima da matarsa kan kin bashi kudi, saboda rashin iya biyan tsohon basussuka.
Ya ce hakan ya fusata mutumin da ya shafe wasu watanni ba ya aiki kuma ya yanke shawarar kashe matar.
Bayan faruwar lamarin, mutumin ya gudu daga gida, yana tunanin matarsa ta mutu kuma saboda tsoron kada ‘yan sanda su kama shi, amma ya koma gida bayan ya samu labarin an ceto matar a asibiti.
“Lokacin da muka gan shi, sai muka sa shi ya sasanta da matarsa da surukinsa, muka aika a kirawo matarsa, amma da ya samu labarin cewa surukinsa ya kai kararsa ofishin ‘yan sanda, sai ya yi tsalle ya shiga rijiyar kuma yan sanda suka dauki wasu mintuna don ceto shi,” inji majiyar.
Da take ba da labarin abin da ya faru da ita, matar mai suna Iya Nife, ta ce mijin nata ne ya yi yunkurin kashe ta a tsakiyar dare tana barci.
"Ya kusa yanka ni ne a lokacin da na ki kara masa kudi bayan na ce ya biya ni bashin da nake bin shi a baya na sama da Naira 200,000, na kwashe kwanaki hudu a asibiti ana yi min magani inda aka ceto ni."
Sai dai an kai mijin zuwa wani asibiti da ba a bayyana ba, yayin da surukinsa ya dage da cewa a kama shi ya kai rahoto ofishin ‘yan sanda.