Yadda ficewar yar siyasa daya daga PDP ya sa mata 1000 suka koma APC a Zamfara
Kimanin mata ‘yan jam’iyyar PDP da ke dauke da kati 1,000 ne suka sauya sheka zuwa jam’iyyar All Progressives Congress (APC) a Zamfara.
Hakan na kunshe ne cikin wata sanarwa da sakataren yada labarai na Gwamna Bello Matawalle, Jamilu Iliyasu ya fitar a Gusau ranar Asabar.
Mutanen da suka bayyana sauya shekar su a gidan gwamnati dake Gusau a daren Juma’a, Gwamna Matawalle ne ya tarbe su da kansa.
Tsohuwar shugabar mata ta jam'iyyar PDP ta jihar, Hajiya Madina Shehu ce ta jagorance su zuwa gidan gwamnati, wadda a baya ta koma APC.
“Madina ta koma APC kuma cikin kasa da sa’o’i 24, nan take mata ‘ya’yan jam’iyyar PDP sama da 1,000 suka bi ta zuwa APC.
“Daga cikin wadanda suka sauya sheka zuwa jam’iyyar APC akwai shugaban matasan jam’iyyar PDP reshen mata na jihar, da masu gudanar da yakin neman zaben mata na kananan hukumomi na dan takarar gwamna na jam’iyyar PDP, Dr Dauda Lawal-Dare.
“Sauran kuma mambobin kwamitin ayyuka ne na jihar da kuma ‘yan majalisar zartarwa na jihar na jam’iyyar,” in ji Iliyasu.
A cewarsa, kodinetan kamfen din jam’iyyar PDP na karamar hukumar Bungudu, Alhaji Ibrahim Leda, da dan takarar majalisar jiha a mazabar Gusau ll, Ibrahim Mada, suma sun sanar da sauya shekarsu zuwa APC tare da daruruwan magoya bayansu.
A nasu jawabin, tsaffin ‘ya’yan jam’iyyar PDP sun bayyana cewa sun sauya sheka ne sakamakon rashin mayar da hankali gami da munanan dabarun siyasa na shugabannin tsohuwar jam’iyyarsu.
Sun sanar da Matawalle, cewa shugabancin jam’iyyar PDP ta yi watsi da magoya bayanta domin tafiyar da harkokin jam’iyyar su kadai.
Gwamna Matawalle ya yaba da matakin da masu sauya shekar suka dauka na komawa jam’iyyar APC a jihar, ya kuma yi alkawarin daukar wadanda suka sauya sheka tare da daukar su kamar kowane dan APC.
Matawalle, wanda shi ne kodinetan shiyyar Arewa maso Yamma na tikitin Tinubu/Shettima 2023, ya yi alkawarin karfafa nasarorin da ya yi wa al’ummar jihar Zamfara, inda ya yi alkawarin kara yin hakan.
"Ya yi alkawarin mayar da martani da kwarin gwiwa da jama'ar jihar suka ba shi," in ji Iliyasu.
Mataimakin gwamnan jihar Sen Hassan Nasiha da sakataren gwamnatin jihar Alhaji Kabiru Balarabe na daga cikin manyan jam'iyyar a wajen taron.