Laifin dukan Alkalin Kotun Majistare a jihar Kebbi duba abin da ya faru da wasu mutane uku
An gurfanar da wani darakta a ma’aikatar ilimi mai zurfi ta jihar Kebbi, Aliyu Shehu Jega da wasu mutane biyu, Yahaya Badaru da Murtala Surajo bisa zargin dukan da ake yi wa babban alkalin kotu na 3 da ke Birnin Kebbi.
Magatakardar kotun wanda ya karanta tuhume-tuhumen da ake masu, ya ce ‘yan sanda sun kama wadanda ake zargin da aikata laifin a watan Satumba.
Dan sanda mai shigar da kara, Jubril Abba, ya roki kotun da ta dage karar, yayin da kuma ya ce ba a samu shaidu a shari’ar ba, sai dai sun tattara bayanan ne domin su shirya kare kansu a gaban kotu.
Shima da yake magana a gaban kotu, Lauya mai shigar da kara, SM Danyaro ya ce laifukan da ake tuhumar wadanda ake zargin sun hada da hada baki, laifi da kuma cin zarafin wani babban Alkalin kotun Majistare.
Yace;
“Abin da ya faru kamar yadda rahoton farko ya nuna shi ne, a wani lokaci a watan Satumbar bana, babban Alkalin Kotun Umar Salisu Kokani ya kasance a ma’aikatar ilimi mai zurfi da ke Birnin Kebbi.
“Lokacin da yake alwala, daya daga cikin wadanda ake zargin ya je wurinsa, sai gardama ta shiga tsakaninsu amma yayin da yake kokarin tafiya sai daya daga cikin wadanda ake zargin, wani darakta a ma’aikatar jihar ya mari shi, sannan wasu mutane biyu suka hada baki suka yi wa Alkalin duka
“Wannan shari’ar ta shafi adalci ne. Alkalin yana mataki na 16 kuma babban Alkalin kotun 3 a jihar Kebbi. Idan za a iya yi masa haka, me zai faru da talakawa?
“Wannan ba shi ne karon farko da ake kai wa Alkalai hari a jihar Kebbi ba. Wasu lokutan ma an kashe wani Lauya a gidansa da ke Birnin Kebbi. Abin da muke so a wannan shari’a shi ne adalci ga Alkali.”
Bayan sauraron dukkan bangarorin biyu, Majistare Hassan Kwaido ya dage sauraron karar zuwa ranar 28 ga watan Nuwamba, don ci gaba da sauraron karar.