Gwamna Aminu Masari na jihar Katsina ya kaddamar da aikin gina gadar sama ta naira biliyan 4.3 a babban birnin Katsina a ranar Laraba.
Ya ce an biya dan kwangilar kashi 50 na kudin aikin kuma za a kare aikin cikin watanni 12.
NAN ta ruwaito cewa Gwamnan ya bayyana cewa, aikin wanda shi ne irinsa na uku a jihar, zai rage cunkoson ababen hawa a yankin Reservation na gwamnati dake cikin birnin Katsina.
“A shekarar 2015 mun kafa kwamitin sabunta birane, musamman a Katsina, Funtua, Daura, Malumfashi, Dutsinma da sauran manyan garuruwan jihar.
“Muna godiya ga Allah da muka zo yau a titin Sarki Abdulrahman domin kaddamar da wannan aiki, kuma cikin wannan lokaci.
“Kafin 29 ga Mayu, 2023, in Allah ya yarda, za mu iya kammala shi, ciki har da inganta zirga-zirgar ababen hawa a Kofar Guga.
“Saboda yawan zirga-zirgar ababen hawa a Kofar Guga Roundabout, mai yiwuwa ba mu da irin wannan tsari, amma za mu samar da tsarin da zai inganta zirga-zirgar ababen hawa,” in ji shi.
Masari ya kara da cewa gwamnatin sa ta yi ayyuka da yawa ta fuskar ayyukan raya kasa duk da kalubalen tattalin arziki da aka samu sakamakon faduwar farashin danyen mai, da kuma annobar COVID-19.
Ya bayyana takaicin yadda matsalar tsaro da ta addabi jihar Katsina.
Tun da farko Kwamishinan Ayyuka, Gidaje da Sufuri, Alhaji Tasi’u Dandagoro ya ce aikin zai ci N4,327,129,296.55.
Ya kara da cewa aikin karkashin Kofar Kaura ya kai kashi 80 cikin 100, yayin da aikin a Kofar Kwaya ya kai kashi 40 cikin 100.
Za a kammala ayyukan biyu a cikin watanni uku da rabi masu zuwa, in ji shi.
A nasa jawabin, wakilin kamfanin gine-gine, Mista Maruen Ghostin, ya nemi afuwar ‘yan kasuwa a yankin da ke wurin a kan rashin jin dadin da suka samu a yayin gudanar da aikin.
Ya kuma baiwa ‘yan kasuwa tabbacin gudanar da aikin cikin gaggawa.